Nung misan eye aquit ing Soundcloud podcast. I refresh yemu ing browser angga keng lunto ya o i tap ing F5 keng keyboard. Dacal a salamat.

Ing tau melalang yang ating macadestinung caantabe queng bie – mapa caluguran, mapa asawa, mapa capatad, pengari, familia.

Manyaman harapan ing daratang istung atin t’ang abe. Itang makaintindi quecatamu at tatanggapan nacatamu bilang itamu, taung e dintang queng bie tamu ban canita bayuan nakatamu, nune abayan queng quecatang malagung bie at aldo-aldo karanasan at macanyan mu naman queya.

Lingapan at luguran, aldong pamiabe, ba canta ena magsisi istung ing aldo pamicawani datang na. Pamikawaning pisikal uling anggang kapilan man ena miquit queti labuad. Pero pakisabi cu, pantunan mucu ustung ing oras dintang na. Tuntunan at tukian cacung suala, yaku’t sucat manaya, calap.

Julius Mariano
Oktubre 5, 2011 1:19PM

Ume ca at maratun cacu
Queng siping ku, queng lele ku
Saluputan keng queng cacung lugud
Micabus queng alang patugut a gulasio, queng alang patnang gulait
Manangis keng casaquitan, queng sugat.

Wangis-wangisan ing quecang penibatan
O’t tune mung kelingwan ing kekang pupuntalan
Lakwas at kusang lub mebating ing ukul
Cambe ning tune prinsipyu’t pangarap
Nukarin ca abe?

Pebusten nang menari reng dapu
Keng silung dareng tune hari
Hari keng lugal a dapat sana malaya, alang tacut
Hanggang kapilan agwantan ing saquit
Ning patsit a makakalait keng balat.

Ibuklat deng mata
Panakawanan ing sala
Sála na tune keka
Abak na abe
Ume naca

Mesulat yapu ini keng amanung kastila, makanyan man, babaldug kepu keng amaung kapampangan ban kanita, abasa yemu naman. Eku pu ekspertu keng amanung kastila nune mu papasyag kupu ing kakung lugud poesya kapamilatan na ning amanung kastila na kelingwan tamung Pilipinu. E pu masusukat ing kekatamung panga Pilipinu keng nanu pa man, nune ing tune lugud keng kalalangan tamu ampon ing ali pamagtakwil keng kekatang pipumpunan bilang tau.

Salamat kang Roxana Saracho Aguilar keng pamag-ustu kareng kakung letra kastila.

Mamá
Julius Ardino Mariano

No te rindas, porque me muero
No llores, porque me duele
No te confundas, porque me descarrilo
Ni te olvides de mi, porque me pierdo.

En tus manos me cuidas
En tu alma me envuelves
Tu cariño nunca esta perdido
Como el sol con sus rayos que duran para siempre

No dejes de rezar, que viva la esperanza
Porque tus oraciones se encuentran aun perdidas
Mantén la lucha por esa libertad tan apreciada
Por que sin ella, se te apaga el alma

No mientas mas, tu dolor resuena en todas partes
Tu alma se muestra dulce, pero su interior en agonía esta
Lastima que la vida es un espejo de ironía
Donde les entregas tu ser, y al final del camino no volverán mas.

Kapampangan

Ima

Eka susuku, uling ikamate ku
Eka manangis, uling ikapanasakit ku
Eka sa paitaranta, uling ikadiskaril ku
Emuku kakalingwan, uling ikaluse ku.

Keng kekang gamat, yaku malilingap
Keng kekang kaladua, yaku mibabalut
Ing kekang lugud, e mewala kapilanman
Anti mo ing aldo, ing queyang iyas lumuat akiang kapilan.

Eka tuknang mangadi, isinup simpan ing kekang kapanayan
Uling ing kekang pangadi, epa miabut at me ramdam
Isundu mu ing laban keng kekang katimawan
Uling nung ala ita, mawala kekang pangatau

Enaka maglaram, ing kekang kapandaman damdam keganaganang lugal.
Ing kekang kaladwa papakit tula, dapot ing kekang kilubluban katmu yang pamagkasakit
kamarinayan uling ing kekang bie katmu yang ironia
Ibie ing kekang sarili, at para ala nang magbalik keka keng kapupusan.

Balita menibat kang kapatad a Gener Marcelo at mipaskil king Facebook page ning Taga Angeles Ku:

“Cabalen keti Angeles, manyad ku pu sanang saup. Nung ninu man ing makakilala kang ALEJANDRO MATTA, taga PAMPANG, na atyu king SAIPAN ngeni, mesakit ya at meospital karin, mesalese ne ngeni at magpasikan pero bisa neng muli.

Sana pu nung ating makakilala, kontakan de karin at pakibalwan ing situasyun na. Penaus ne mu pu nitang Dara kung atyu karin anya abalu ku iti.

Dacal a Salamat Cabalen.”

Nung kareng balang dapat atin matang makalawe
At kareng balang mali alang makayadyang pamantabe
Lagi namung mipanyisi at mipanuldu kareng bague bague
Para nokarin yapa ing relasyun ampong pamiabe?

August 29, 2010

Makalungkut isipan na kerakalan kareng kayanakan ngeni na dapat mag-aral, mamyalung, lilingapan deng pengari keng bale, atiu keng dalan, manintunan. Misan pa, ikit tamu ing makapagmulalang katutuan ukul keng e matulid ampon pilít a pamanintun da reng keyanakan. Dapot makanyan man patuluy lang makasara deng kekatang balugbug at mata uling balu tamu ing cancer a mamangan keng laman ning kasalunsungan a sociedad a malalam ne piugatan at masakit neng uluan.

Nanu pa mo, ikatamu pilit mamag asa na datang ing aldo, mikabyus tamu keng kasakitan at akit ta ing sala keng libutad na ning pisak; keng dalumdum.

Reng anak tune lang guintu, tune pag-asa ning balén. Etala pabusten. Lingapan tala. Luguran tala.

Retrato ibat kang Patrick Diokno

Salamat Keng Uran

Salamat na mu keng patak ning uran

Misalikut sakit a kanakung panamdaman
King lalam ning dalumdum ampong patak ning danum
Anti ya mo kanaku ing banua maki-agum

Kabang ing uran durugpa king kakung lupa
Makisabe na ring tutulo ing kanakung lua
Ing puso ku kasalukuyan yang manangis
Uling ala naman kanakung manapis

Paburen me pang patak, e ka pa tutuknan
Keng kanakung lungkot, ume mu kung damayan
Isalikut mu ku king patak, patak na ning uran
Ala nang dapat makabalu keng pusu kong manamdaman

Dakal salamat… Salamat keng uran…

__________________
Roy Dela Cruz
July 29, 2010 | 10:04 pm
Angeles City, Philippines
¯¯¯¯¯¯¯¯¯¯¯¯¯¯¯¯¯¯

E lingad na dacal kekatamung Pilipinu ing kalulu at túne daranas kasakitan keng bie. Makanyan man, makananu man kasakit keng palague tamu ing kekatang daranasan, dacal parin ing mas magkasakit at aturing tamung túne lipit (needy) keng bie. Nanu pa ta, ika at aku, atin tang kanya-kanyang daralan a personal a bagahi o kapagsubukan keng bie; kapagsubukan na e aliwa kareng kerakalan.

Ing uyat na ning kakaluluan keng Pilipinas masakit yang talukian at bagutan. Dinalan nala reng dacal a pamuntuc ning balen na meg aral keng aliwa liwang bansa at malawak a sibúkan (experience) keng bie, pero ing kakaluluan e parin mewala. Túne na kabang mabibie ya ing tau, e mawala iti.

Dapot ikatamu agyu tamung káwala keng tanikala na ning lipit a kabilyan nung maniwala tamu keng sarili tamu at gamitan ing egana-ganang oportunidad para mabiasa tamu at maging experto keng kekatang piniling profesion.

Misan, keng libutad na ning imahe na ning kakaluluan, pipilian tamu ing manahimik uling balu tamu na ing pakibat keng kalutasan na niti masakit yang balangkasan.

Keng balayan a mikawa-kawani sankan keng maragul a sugat na dinulut na ning alang patnang protesta keng dalan at siri (greed) keng upaya, e malaut ing Pilipinu mantun yang inspirasyun kareng taung mamuntuk keng balen. Dapot nukarin ing tutung inspirasyun? Atiu ba kareng aliwang tau o kareng kekatang sarili?